|
|
Segunda feira (23/09/2019)- Nukleo estudante mak hanesan parte importante ida ba departamentu sira iha Fakuldade laran, sai hanesan mahon ba estudante hotu atu halibur hamutuk hodi ajuda ba dezenvolvimentu departamentu nian. Ohin loron departamentu Engañaria Sivil hala’o eleisaun ba xefi nukleo foun hodi bele troka xefi sesante tamba nia tempu to’o ona hodi bele fo oportunidade ba estudante seluk atu bele kandidatu aan ba eleisaun refere. Iha eleisaun ba xefi nukleo foun ne’e hetan partisipasaun husi dosenti Enjeñaria Sivil no estudante ativu sira. Kandidatura ba eleisaun Nukleo Enjeñaria Sivil mai husi estudante semester ne’en (6) no kandidatura dahuluk ho naran Agino F. da Cruz Baptista no kandidatura darua maka estudante ho naran Elisio da Costa de Sá.
Iha abertura ba eleisaun refere, director Departamentu Enjeñaria Sivil Eng. Alfredo Ferreira hateten: ”Agradese ba xefi Nukleo tuan ho estrutura ne’ebe durante ne’e servisu hamutuk no fo suporta ba departamentu, hein katak kandidatura foun sira bele hadia ita nia kondisaun iha ita nia departamentu liliu iha parte disiplina hanesan disiplina iha estudu, ambiente no mos respeitu malu tuir angkatan”
Molok kandidatura sira hala’o sira nia kampaña xefi nukleo sesante Martalena da Costa Brito mos hateten :” Nukleo ne’e laos w mesak, laos ami komisaun deit, maibe nukleo ne’e ita hotu nian , hamutuk ita bele dezenvolve ita nia departamentu no husu ba estrutura foun ne’ebe eleitu atu nafatin kolabora ho ami atu ita hamutuk hi’it ita nia departamentu ba oin. Agradese mos ba parte IT Fakuldade ne’ebe ajuda ona ami liu husi Sistema Vota Online ne’ebe bele hafasil aktividade loron ohin nian”.
Iha biban ida ne’e mos Eng. Mariano Renato Monteiro da Cruz nu’udar Dosenti iha Departamentu Sivil enkoraja nafatin estudante sira atu bele preprara a’an didiak tamba atu sai lideransa presiza aprende husi parte ne’ebe kiik hafoin ba bo’ot.
“Hau husu ba imi hotu atu bele hatudu imi nai a’an katak imi bele, maibe dalabarak imi nunka koko atu hatudu a’an iha oin entaun imi nakdedar no planu diak sira imi haluha lakon hotu, entaun iha fatin ida ne’e no husi organizasaun sira hanesan ne’e imi bele aprende oinsa mak lidera ema, organiza ema, bele mos fo kritika maibe tenki mos fo alternativu no solusaun” hateten Eng. Mariano.
Departamentu Enjeñaria Sivil primeira vez utiliza Sistema Vota Online ba iha eleisaun nukleo tamba ne’e husi komisaun sira hala’o esplikasaun ba lalaok oinsa atu utiliza Sistema ne’ebe fo vantazen bo’ot hanesan la gastu surat tahan ba print no seluk, sei la gastu tempu barak tamba estudante sira bele asesu husi sira nia telemovel liu husi rede internet ne’ebe fakuldade oferese, no sira presiza deit log in ba iha Sistema liu husi enderesu ne’ebe oferese utiliza sira nia numeru registrasaun estudante (NRE). No sistema mos sei halo kontajen otomatikamente ba votus husi votantes sira ne’ebe vota no bele hare direitamente rezultadu iha sistema ne’e. Sistema Vota Online ne’e rasik kria husi Departamentu Enjenaria Informatika no oferese ba iha Fakuldade atu bele ajuda fakuldade no departamentu sira seluk iha parte eleisaun nian.
Bazeia ba rezultadu votus ne’ebe iha xefi nukleo estudante departamentu Engañaria Sivil eleitu iha eleisaun ne’e maka kandidatura dahuluk ho naran Agino F. da Cruz Baptista ho votus 273, no kandidatura darua hetan deit votus 81. Ba Xefi Nukleo no estrutura sei simu tomada de posse iha fulan oin mai.
