|
|
Segunda Feira (14/10/2019)-Kopa Enjeñaria hanesan atividade annual ne’ebe realiza iha Fakuldade Enjeñaria, Siensia no Teknolojia. Atividade ne’e la bele realiza iha tinan kotuk tamba kestaun orsamentu maibe iha tinan ida ne’e ho esforsu husi komisaun organizadora hamutuk ho Asosiasaun estudante FEST no Vice Dekanu Assuntu Estudantil Eng. João Bosco R. Fernandes Cabral konsege realiza Kopa Enjeñaria hodi komemora loron 12 de NOvembru ba dala rua nulu resin ualu (XXVIII), ho tematiku “Liu husi Taxa Enjeñaria 2019 mai ita haburas Unidade no Fraternidade hodi Tane a’as FECT sai Sentru Excelensia ba Siensia no Teknolojia”. Atividade ne’e bele kria lasu amizade entre FEST ho komunidade no Forsa Naval Hera.
Serimonia ba abertura kopa Enjeñaria 2019 realiza iha Kampus Hera, partisipa husi Dekanu FEST Dr.Ruben Jeronimo Freitas no estrutura, reprezentante Forsa Naval Hera, reprezentante Pro-Reitor Assuntu estudantil, Dosente no estudante ativu FEST.
Iha abertura Vice Dekanu Assuntu Estudantil Eng. João Bosco R. Fernandes Cabral hateten Kopa Enjeñaria ne’e aktividade ida ne’ebe laos kona ba desportu deit maibe iha mos atividade hanesan artes e kultura, kompetisaun ba Catur no seluk tan.
“liu husi atividade hanesan ne’e ami nia estudante sira laos matenek deit iha siensia no teknolojia maibe sira mos sei hariku a’an liu husi sira nia talentu bai ha aktividade extrakurikuler hanesan ne’e ” hateten Eng. João Bosco
Iha parte seluk dekanu FEST mos hateten katak nia senti orgullu tebes tamba nia estudante sira la depende ba orsamentu ne’ebe aloka husi Universidade maibe sira iha espiritu ne’ebe makaas atu bele hamriik mesak hodi buka solusaun atu bele realiza atividade refere tamba infelizmente labele realiza atividae ne’e tinan kotuk.
Jogu futebol abertura ba Kopa Enjeñaria 2019 husi funsionariu FEST hasoru estudante Departamentu Enjeñaria Informatika semester 4 , no voleibol husi estudante semester 2 hasoru semester 4, parte rua ne’e husi Departamentu Enjeñaria Geolojia e Petroleo. No jogu sei kontinua tuir orariu ne’ebe determina ona husi parte komisaun organizadora.
Atividade ne’e realiza tamba hetan suporta husi Federasaun Futebol Timor Leste (FFTL), Lalenok FC, Timor Telekom (TT) , Alumni FEST, Dosenti FEST no Forsa Naval Hera.
