|
Cinque Terre

RIMR Group hala’o aprezentasaun kona ba Low Cost Technology ba DNEPCC-MOP

Quinta-Feira (24/10/2019)- Road Infrastructure Monitoring Research (RIMR) Group mak hanesan grupu ida ne’ebe hala’o peskiza iha area monitorizasaun infraestrutura ba estrada. Membru grupu kompostu husi dosenti Fakuldade Enjeñaria Siensia no Teknolojia-UNTL mak hanesan dosenti Enjeñaria Sivil, Mariano Renato Monteiro da Cruz, M.Eng no dosenti nain rua husi departamentu Enjeñaria Informatika Frederico Soares Cabral, M.Eng  no Vosco Pereira, M.Eng.  

Grupu RIMR hala’o aprejentasaun  kona ba peskiza ne’ebe sira halo ba Vice-Ministru Obras Publikas Sr. Nicolau Lino Freitas Belo  no mos diretores sira husi Diresaun Nasional Estradas Pontes e Controlo de Cheias (DNEPCC) kona ba Sistema Integrado ba Monitorizasaun Infraestrutura Estrada utiliza Teknolojia ho kustu ne’ebe Nato’on  (Low Cost Technology) iha sala enkontru DNEPCC, Dili(23/10).

Iha aprejentasaun ne’e  hatudu kona ba aplikasaun  smartphone tolu  ne’ebe ajusta hamutuk sai Sistema ida (Smartphone Sensor “signal processing” , Dashboard Camera utiliza tekniku “Image Processing”,  no Visual Inspection) ne’ebe bele halo survei  ba kondisaun  no levantamentu dadus iha superfisie estrada ba iha klasifikasaun dalan ne’ebe ho aspal ka la ho aspal, buka hetene deteksaun anomalia,  estimasaun estrada kaber ka lae, deteksaun no estimasaun nakfera no kuak iha estrada, drainajen, deteksaun ba ponte, gorong-gorong , bronjon, gabion no mos deteksaun rai halai ka monu. Hafoin visualiza ba Mapa hodi bele detekta kondisaun estrada nian. Liu husi levantamentu dadus sira ne’e hotu mak konklui katak Sistema ne’e bele utiliza Smartphone no Dashboard Camera ba monitorizasaun kondisaun iha superfisie estrada,  bele sai hanesan ekipamentu monitorizasaun kondisaun estrada iha Timor Leste tamba kompleta ho sensor ne’ebe oioin no ho presu ne’ebe kiik (low cost) , aplikasaun ne’e mos fasil atu uja no bele atu halo dokumentasaun dadus ba kondisaun infraestrutura estrada, rezultadu husi Sistema bele sai lista prioridade ba rekomendasaun atu rehabilita no halo manutensaun, no husi Sistema ne’e fasil atu hetan identifikasaun fatin anomalia no rezulta estimasaun orsamentu provijoriu.

”Aplikasaun ne’ebe ami kria bazeia ba ita nia nesesidade, imi bele hatete imi nia hakarak kona ba lalaok Sistema nian no ami bele kria tuir imi nia nesesidade karik ami hasoru difikuldade ruma ami iha supervisor husi Professsor sira iha Universidade Japaun ne’ebe mak  kolabora ho ami, maibe agora ita uza uluk buat ne’ebe iha tamba iha no hahu tia lai mak ita foin bele hadia diak liu iha futuru mai”.hateten Eng. Mariano Renato iha nia aprejentasaun.

Sistema ne’ebe mak aprejenta ho objektivu atu ajuda parte governu iha dezenvolvimentu nasaun ne’e nian, bele mos promove produtu  timoroan nian iha parte ICT no kria mos kooperasaun entre UNTL ho parte DNEPCC.

Vice Ministru Sr. Nicolau satisfaz tebes no hateten katak ho aprejentasaun ne’ebe hala’o husi parte UNTL  liu husi Sistema ne’ebe  kria, parte  Ministro, Vice Ministro  no diretores sira bele hatene kona ba alokasaun orsamentu kada tinan ba iha rehabilitasaun no manutensaun ne’ebe fasil atu ezekuta no  mos bele halo komparasaun kustu ba iha Sistema uluk no ba Sistema ne’ebe utiliza Smarphone.  No bele mos halo kooperasaun liu husi buat ne’ebe kiik ida ho nun’e iha futuru hakarak adisional bele hala’o buat ruma ne’ebe bo’ot.

“Hau hare’e husi aprejentasaun ne’e hanesan faze inisial ida entre UNTL no MOP ba koperasaun nian tamba iha MOP nia papel balun hateten katak iha responsabilidade halo kordenasaun ho universidade governu nian ne’ebe define kedas UNTL, entaun saida mka ita halo ona ho UNTL, tan ne’e liu husi aprejentasaun ne’e ita bele halo ona kooperasaun ba buat kiik ruma. No iha desijaun politika ita sei koalia ho exselensia Ministru hodi informa oinsa halo ida ne’e sai ba rezultadu par ita bele hare sai hanesan pilotu ida liu husi  esperiensia teste ba Sistema refere, no ita mos  sei tur hamutuk atu halo baze legal ka MoU entre UNTL ho DNEPCC”. hateten Vice Ministru.

Iha tempu badak sei iha kooperasaun ne’ebe legal husi parte rua atu bele hala’o servisu hamutuk hodi kontribui ba dezenvolvimentu  iha nasaun ida ne’e.

Mapa Local FECT



Pagina Facebook


Ba Leten