|
|
Sesta-Feira (06/12/2019)- Universidade Nasional Timor Lorosa’e hamutuk ho Exótica Unipessoal LDA hala’o aprejentasuan iha seminariu Enjeñaria no Teknolojia avansadu ho tema “The Best Solution for Stabilization, Compaction and Impermeabilization for all type of Soils” ne’ebé realiza iha Auditorium edifisiu Fakuldade Enjeñaria Siensia no Teknolojia Hera, Cristo-Rei, Dili (05/12).
Iha seminariu ne’e partisipa husi Magnifiku Reitor UNTL Prof. Dr. Francisco Miguel Martins, Pró-Reitor dos Assuntos da Cooperação Prof. Dr. Eduardo Aniceto Serrão, Dekanu Fakuldade Enjeñaria Siensia no Teknolojia Dr. Ruben Jeronimo Freitas ho Estrutura, Dosenti no estudante Departamentu Enjeñaria Sivil, Diretora Exótica Unip. Lda Mirabella F. Sarmento hamutuk ho nia enjiñeiru Dr. Jose Salionas, Eng. Paulo Guereiro no Tekniku Francisco Pac, Reprezentante husi Laboratoriu Nasional, Reprezentante Ministerio Obras Publikas, R4D, Dosenti no Estudante Civil Engineering husi DIT no mos konvidadus espesial sira seluk.
Bazeia ba MoU ne’ebe assina ona husi Parte rua UNTL no Exótica Unip. Lda atu bele halo kooperasaun diak liu iha parte peskiza ba implementasaun sistema teknolojia foun ba solo liu-liu iha area estrada nian. Objektivu husi seminariu ida ne’e atu hatudu rezultadu husi sistema teknolojia foun ne’ebé utiliza komponente líkidu kímiku, produs husi kompañia Exótica hodi implementa ba estrada sira. Teknolojia ne’ebe aprejenta iha nia benefisiu sira hanesan kustu ne’ebé baratu, prosesu aplikasaun ne’ebé lalais, dura no produtu ne’e 100% ekolojiku. Produtu ne’e mos bele minimiza utilizasaun aspal iha area rural tamba aspal labele kobre hotu iha area rural bazeia ba orsamentu ne’ebe fornese la to’o.
Tuir ajenda, produtu líkidu refere sei halo teste iha area estrada diresaun Hera ba Remexiu besik kompañia Heineken no sei partisipa husi parte FEST-UNTL, Instituisaun Governu no mos Kompañia Exótika rasik.
