|
Cinque Terre

Serimonia Inagurasaun ba Edifisiu Foun FEST

Quarta Feira (15/01/2020)- Edifisiu  foun Fakuldade Enjeñaria, Siensia no Teknolojia (FEST) ne’ebe hetan ajudu husi Governu Japaun liu husi Japan International Cooperation Agency (JICA)  projetu CADEFEST faze darua. Edifisiu ne’e konstrui  husi fulan  Fevereiru 2018 to’o Outubru 2019 (fulan 19) husi Rinkai Nissan Construction Co.,Ltd ho supervizaun hamutuk husi Yamashita Sekkei Inc no Intern Consulting, Inc ho valor orsamentu 2.231 biliaun yen (kuaze USD21m). Projetu refere fó servisu ba traballadór lokál hamutuk 122. Edifisiu refere hetan  inspesaun ikus iha loron 14 Outobru 2019 no  hatudu katak konstrusaun ne’e remata ona, hafoin entrega xavi edifisiu nian husi Kompañia Ringkai Nissan no konsultan Yamashita Sekkei ba iha Universidade iha loron 17 Outubro 2019. Hala’o serimonia  inagurasaun ba edifisiu foun FEST iha loron Tersafeira 14 Janeiru 2020 iha auditorium FEST Hera, Cristo-Rei.

Iha serimonia inagurasaun ne’e partisipa husi Magnifiku Reitor UNTL Prof. Dr. Francisco Miguel Martins no Pro- Reitores sira, Ministru  Ensinu Superior, Siênsia no Kultura Dr. Longuinhos dos Santos, Vise-Ministru Obras Publikas Nicolau Freitas Belo, Vise-Ministru Parlamentar Negósiu Estrangeiru Japaun Sr. Norihiro Nakayama, Embaixador Interinu Japaun ba Timor Leste Sr. Shingo Nagashimoto, Xefi reprejentativu JICA iha Timor Leste Sr. Masafumi Nagaishi, membru korpu diplomatiku no autoriedade seluk, Eis Prezidenti da Republika no Premiadu Novel da Paz Dr. José Ramos Horta ,reprezentante Consorsium Yamashita Sekkei no kompañia Ringkai Nissan, Dekanu, Dosente no estudante FEST no konvidadus VIP sira.

Iha biban ida ne’e Reitor UNTL Prof. Dr. Francisco Miguel Martins hato’o agreadese ba iha governu Japaun ne’ebe ajuda komesa iha  tinan 2001 to’o agora,  hahu husi rehabilitasaun urjenti ba edifisiu balun iha FEST,  projetu ba kapasidade dezenvolvimentu material hanorin no haruka professor voluntariu sira husi universidade Japaun atu ajuda iha Fakuldade Enjenaria, projetu ba introdusaun enerjia  sistema eletrisidade uja solar, oferese  ekipamentu de aula, fornese bolsa ba mestradu no dotoramentu ba dosenti FEST no Konstrui Edifisiu ba FEST-UNTL liu husi projetu CADEFEST faze darua ne’ebé mak ohin loron inagura ona.

 “Agradese ba Governu Japaun fo ajuda ba ita liu husi Fakuldade Enjeñaria Siensia e Teknolojia atu eleva operador sira iha prosesu dezenvolvimentu nasaun ida ne’e ” hateten Reitor UNTL.

Iha parte seluk Ministru  Ensinu Superior, Siênsia no Kultura Dr. Longuinhos dos Santos hateten katak area enjenaria ho saude hanesan area ida ne’ebe importante ba dezenvolvimentu nasaun.

 ”Edifisiu ne’ebe ohin loron ita inagura sei hadia kondisaun aprendijazen iha area importante hanesa area enjenaria   hodi dezenvolve ita nia nasaun no ita hotu hatene katak area enjenaria no saude  prexiza kondisaun espesifiku no diferensia tebes ho kursu sira seluk no prexija iha laboratotiu, sala ba aula nian, ekipamentus espesifiku no mos iha ligasaun internet ne’ebe ohin loron sai sasukat importante tebes ba ensinu superior ” hateten Dr. Longuinhos dos Santos.

Edifisiu ne’e kompostu husi sala ba aula 20, (aula 15 bele akomoda ema 40, aula 5 bele akomoda ema 80), auditorium ho kadeira 400, bibilioteka, eskritoriu ba dekanu,dosenti funsionariu administrasaun sira no  asesu dalan ba ema defisiente sira. Iha mos ekipamentus ne’ebe mak oferese hanesan ekipamentus aprendizazen no laboratoriu  ba departamentu lima ne’ebe eziste iha Fakuldade Enjeñaria (Mekanika, Sivil, Elektronika i Elektrika, Informatika no Geolojia iPetroleu)

Mapa Local FECT



Pagina Facebook


Ba Leten