|
|
Hera- Fakuldade Enjeñaria Siénsia no Teknolojia (FEST), liuhusi Asosiasaun Akadémika Estudante (AAE) realiza reestruturasaun ba estrutura tuan ne’ebé remata ona mandatu liuhusi eleisaun ne’ebé partisipa husi estudante sira iha departamentu lima iha FEST.
Reestruturasaun ne’e, hala’o iha Kampus Hera loron 14/11 no kandidatu husi pakote haat ne’ebé reprezenta husi depatamentu haat exeptu Jeolojia.
“Serbisu Asosiasaun Akadémika Estudante Fakuldade difisil maibé iha posibilidade manán esperiénsia no aprende sai lideransa, reprezenta no lori inspirasaun estudante nian hato’o ba parte relevante” , hateten Alexandrino Gomes nu’udar eis-prezidente AAE antes eleisaun.
Eis-prezidente ne’e rekomenda ba prezidente no estrutura foun ne’ebé eleitu, presiza tau interese nasionalizmu nu’udar akadémika atu lori fakuldade ne’e ba oin hamutuk estudante no estrutura fakuldade nian.
“Progresu atividade ne’ebé durante ami hala’o, hamutuk ho AAE husi fakuldade hitu organiza Dies Natalis iha tinan kotuk, hato’o ezijénsia ba universidade kona-ba dormitóriu ba estudante sira, organiza estudante sira hamutuk ho komunidade Aileu komemora loron 20 Maiu, no organiza programa orientasaun akadémika ba estudante foun iha fakuldade”, hatutan nia.
Fonte ne’e akresenta katak iha atividade barak mak AAE hala’o ona no iha mós atividade ne’ebé seidauk hala’o ho di’ak no estrutura foun ne’ebé sei lidera karik iha programa balun ne’ebé presiza kontinuasaun no balun elimina bainhira laiha benefísiu ba estudante sira.
“Antes atu finaliza ami-nia knaar hakarak hameno ba estudante sira ne’ebé hela iha dormitóriu atu kuidadu fatin ne’e hanesan kuidadu an rasik no tenta hala’o buat ne’ebé bele halo atu labele husu de’it ba universidade”, hameno eis-prezidente AAE ne’e.
Iha fatin hanesan ViseDekanu Asuntu Akadémiku FEST Frederico de Carvalho, hateten estudante iha knaar atu estuda maibé presiza envolve iha atividade akadémiku sira atu sensibiliza no hadi’ak buat ruma ne’ebé la’o laloos iha fakuldade no universidade ne’e.
“Ha’u-nia lia-menon ba estudante sira katak bainhira ba hamutuk ho sosiedade iha buat ruma laloos tuur hamutuk ho sira oinsá rezolve” , hato’o Visedekanu.
Fonte ne’e mós hatutan husi fakuldade agradese ba esforsu no komitiva tomak husi estrutura tuan sei fó agradesimentu ho sertifikadu ruma tanba estudante tinan-tinan sempre troka fatin maibé dosente sira sei nafatin.
Kandidatu ba eleisaun ne’e: Afonso A. Soares, António Lobo, Alexandre Marques no joãojinho G. Barros, depois liu tiha eleisaun, rezultadu hatudu António Lobo ho nia Pakote mak manán ho votu 240 husi pursentu 42,11.
