|
|
Auditóriu-Iha kuarta (28/05) liuhusi reuniaun Xefia ne’ebé realiza husi Proreitór Infrasestrutura no Grande Projetu ho estrutura Universidade Nasionál Timor Lorosa’e (UNTL) hodi diskute rezultadu aprezentasaun dezeñu detalladu husi kompañia internasionál tolu ne’ebé sei kaer projetu konstrusaun edifísiu foun ba Fakuldade Enjeñaria Siénsia(FEST) I Teknolojia no Agrikultura (FA) ne’ebé sei hatuur iha Hera.
Proreitór Ananias Barreto informa, enkontru ida ne’e tuir programa universidade nian ne’ebé antes ne’e atu dezenvolve UNTL ba iha Hera tuir planu estratéjiku ne’ebé iha ona.
“Tinan sanulu to’o sanulu-resin-lima mai universidade nia fatin sei tau iha Hera, ne’ebé mak governu aloka ona rai hektares 350 ba UNTL,” tenik Proreitór iha nia knaar fatin.
Fonte hatutan husi reuniaun ne’e mós fó sai rezultadu aprezentasaun dezeñu husi kompañia Internasionál tolu hanesan Philkoei Internasionál, Dalan no Bernabad, ne’ebé mak manán iha tenderizasaun avalisaun husi komisaun nasionál aprovazionamentu iha gabineti primeiru ministru.
“Universidade só para implementa de’it ita-nia programa, maibé prosesu tomak sentralizadu iha komisaun aprovazionamentu ,” dehan Pro-Reitór Ananias.
Nia mós saliente, projetu ne’e sei halo sosializasaun informasaun ba estrutura FA ho FEST no konsultasaun ho fakuldade ida-idak husi etapa ba etapa hanesa faze primeiru.
Pro-Reitór hatutan, orsamentu ba projetu ne’e prevé iha fundu infraestruturas ho verba U$1.4 millaun, iha orsamentu 2013 to’o agora hahú uluk ho dezeñu detalladu estudu promenór ba Fakuldade rua ne’e.
Fonte hateten, dadauk projetu ne’e komesa la’o ona iha tinan ne’e maibé implementasaun fíziku iha 2015 ho nia durasaun to’o 2020.
Entertantu tuir dokumentu estimasaun totál orsamentu ba projetu fakuldade Agrikultura ho montante USD$ 741.600.00, Enjeñaria $ 670.000.00 no ba planu Promenór setór primeiru ho montante $ 820.000.
Iha sikun seluk, visedekanu asuntu administrasaun, fakuldade Enjañaria Siénsia no Teknolojia, Justinho da Costa Soares, nia parte sente di’ak tebes ho rezultadu aprezentasaun dezeñu konstrusaun edifísiu FA ne’ebé aprezenta husi kompañia Internasionál maibé persiza haree uluk espasu molok halo konstrusaun.
“Ami fakuldade Enjeñaria iha tiha ona konstrusaun balun ne’ebé tenke haree mós ida ne’e, para bele utiliza didi’ak fatin ne’ebé iha hodi halo desaing fali,”dehan visedekanu Justinho.
Nia kestiona obra presiza halo koordenasaun uluk ho fakuldade tanba JICA husi Japaun sei ajuda mós fakuldade Enjeñaria atu halo mós edifísiu balun tan ne’e tenke haree didi’ak , molok implementa projetu refere.
Visedekanu sujere ba Universidade la’ós haree de’it ba konstrusaun edifísiu maibé iha mós problema seluk kona-ba bee moos tanba fakuldade ne’e to’o agora sei konsumu de’it bee husi posu.
“Ami fakuldade Enjeñaria dezde Indonézia to’o agora uza mak bee Posu, ita halo tiha edifísiu no buat hotu didi’ak maibé bee laiha ne’e problema,” salienta Justinho.
Entretantu nia sujere tan wainhira projetu ba konstrusaun infrasestrutura fíziku komesa , universidade mós tenke la’o hamutuk ho kompañia sira hodi bele garante kualidade ba obra ne’e hodi bele utilza ba tempu naruk nian.*Cypy & Zaky*
