|
Cinque Terre

Fakuldade Enjenaria Siensia no Teknolojia (FEST) realiza jogu Futebol no Voleibol

Hera- Jogu ne’e ho objetivu kria amizade entre estudante sira iha fakuldade refere, selebra loron proklamasaun unilaterál independénsia RDTL nian no selebra dies natalis UNTL.

“Ha’u haree jogu ne’e hala’o ami iha fallansu balun maibé ami tenta atu hadi’ak hodi nune’e jogu iha futuru mai bele di’ak liután” António Lobo, nu’udar Xefe Komisaun, hateten iha Kampus Hera (07/11).

Xefe komisaun  ne’e hatutan jogu ne’e hetan apoiu husi Diresaun Administrasaun Jerál hanesan farda, bola, bee, prémiu osan hamutuk $ 530, 00 maibé iha futuru presiza tan ajuda atu fakuldade bele konvida jogadór sira husi fakuldade seluk bele partisipa.

“Iha mós difikuldade balun ne’ebé ami hasoru mak transporte atu tula jogadór sira ne’ebé hela iha Dili no estudante seluk atu haree no harame maibé tanba transporte laiha entaun estudante sira tenke fila sedu ho karreta Universidade nian”,Lobo hatutan.

Xefe komisaun ne’e husu ba Universidade liuliu Diresaun Lojístika no Transporte, kona-ba kestaun transporte atu iha tempu oin mai karreta universidade nian bele hein estudante sira to’o jogu remata mak lori sira fila bá Dili.

“Jogu ne’e husi inísiu parte husi fakuldade no dosente sira ladún partisipa ho másima, atu apoia atividade jogu ne’e bele ho di’ak” Lobo informa tan.

Nia mós rekomenda ba jogadór sira atu hatudu jogu ho di’ak no kreatividade no desportividade nu’udar sosiedade akadémiku atu atividade ne’e bele la’o ho susesu.

Tuir visedekanu Asuntu Estudantíl, Adalfredo Ximenes, katak atividade jogu ne’e importante ba estudante sira atu partisipa hodi hili estudante sira ne’ebé kualifikadu di’ak hanesan preparasaun ida karik iha futuru  sira bele reprezenta fakuldade ba joga iha liur.

“Ha’u hakarak husu ba universidade, liuliu Visereitór Asuntu Estudantíl, iha futuru presiza tau verba orsamentu ruma ba atividade hirak hanesan ne’e, hodi fasilita estudante sira nomós estudante sira jogu ho didi’ak no labele tebe malu”, Adalfredo hateten.

Visedekanu ne’e aumenta tan jogu ne’e hanesan programa estrakurríkulár ne’ebé realiza kada tinan iha fakuldade, atu estudante sira bele koñese malu.

Relasiona ho jogu ne’e, Afonso Alves Soares, nu’udar jogadór sente kontente tanba bele partisipa iha atividade ne’e hodi bele koñese malu di’ak liután ho kolega sira.

“Dalaruma ami sente hanesan mesak de’it, tanba kolega estudante sira barak la mai asiste jogu tanba fasilidade transporte nomós estrutura fakuldade no dosente sira maioria la partisipa” Afonso komenta.

Jogadór ne’e hateten katak kondisaun kampu ladún di’ak, rezulta jogadór sira balun monu kanek no farda jogu nian presiza apiu husi universidade .

Nia  husu ba estudante sira atu fó liman ba maluk hamutuk partisipa hodi aselera desportu hanesan dezenvolve fakuldade.

Atividade jogu ne’e tuir observasaun ekipa Semanál, jogadór sira partisipa ho di’ak, maibé estudante sira ladún asiste barak tanba realiza iha tempu loraik entaun estudante sira fila sedu ho karreta universidade nian.

Mapa Local FECT



Pagina Facebook


Ba Leten