|
Cinque Terre

Departamentu Jeolojia Selebra Loron Jeolojia

Liceu-Fakuldade Enjeñaria Siénsia I Teknolojia, Universidade Nasionál Timor Lorosa’e (UNTL) liuhusi Departamentu Jeolojia koopera ho Dili Institute of Tecnology (DIT) selebra hamutuk loron moris Jeolojia hodi realiza semináriu, jogu amizade no expozisaun.

Tuir Diretór Departamentu Jeolojia, Vital Cruz Malai Vila Nova iha Liceu (30/05) hateten, atividade hirak ne’e hala’o atu selebra loron Jeolojia ne’ebé monu iha loron 30 Maiu, atu hamorin unidade entre estudante Jeolojia sira hanesan komunidade ida.

“Aleinde atividade hirak ne’e, ami hakarak update informasaun ne’ebé foun liuliu iha Timór relasiona ho Jeolojia tanba iha palestra ko’alia kona-ba mapa Jeolojia ba estudante sira ligadu ho mapa ne’ebé Diresaun Nasionál Kontrolu Kualidade Água no Urbanizasaun ne’ebé publika iha Janeiru liubá”, dehan Vital.

Diretór ne’e aumenta, atividade semináriu no expozisaun realiza iha UNTL, embora jogu amizade realiza iha DIT maibé envolve estudante sira husi DIT no UNTL liuliu hirak ne’ebé hola parte ba kursu Jeolojia.

“Ha’u hakarak husu ba estudante sira atu aproveita ho atividade hirak ne’e atu sira bele kria uniaun ida ne’ebé metin hodi ajuda malu iha traballu sira no fahe informasaun ba malu” rekomenda Vital.

Relasiona ho selebrasaun loron Jeolojia tinan ne’e, Ezequiel Nunes nu’udar estudante sente orgullu ho atividade hirak ne’e tanba bele fortifika no publika kona-ba koñesimentu ne’ebé hetan ona iha aula.

“Husi eventu ne’e, ami bele envolve direta iha atividade hirak ne’ebé realiza ona maibé hein katak bele ajuda ami iha prátika”, komenta Nunes.

Estudante ne’e husu ba parte universidade no ministériu relevante katak estudante sira presiza mós prátika  barak, entaun nesesáriu tebes ba fasilidade atu estudante sira bele uza.

“Difikuldade ne’ebé durante ne’e ami enfrenta mak orsamentu, ami hatama proposta ba iha fatin barak maibé balun de’it mak pasa no triste ida mós bainhira orsamentu ne’ebé universidade fó la direta mai hodi jere rasik maibé fó de’it hahán”, Nunes informa.

Atividade iha loron Jeolojia ne’e mak halo semináriu, jogu amizade no expozisaun ho fundu husi UNTL hamutuk $ 4000,00 (rihun haat) no Ministériu Petróleo Rekursu Naturais ho montante $1000,00 (rihun ida). 

Mapa Local FECT



Pagina Facebook


Ba Leten