|
|
Tersa feira (26/04/2016) Astomos Energy corporation - Japan ho Universidade Nasional Timor Lorosa’e - UNTL halao serimonia apresentasaun bolsu estudu ba estudante nain 20 husi Universidade Nasional Timor Lorosa’e iha Auditorium Fakuldade Edukasaun, Arte no Humanidade UNTL.
Besik ema nain 70 mak partisipa, inklui Reitor UNTL no representante funsionariu Universidade nian, Governu, Embaixada Japaun iha Timor-Leste no mos reprejentante husi Astomos ne’ebe atende kona ba serimonia ne’e.
Astomos hanesan Kompañia Sektor Enerjia nian, ne’ebe hari iha 2006 no agora dadaun Kompañia ne’e iha funsionario entre 1800 iha tinan 2015, volume husi faan maka entre biliaun 5 USD. Komesa 2008, Astomos hola Liquid Petroleum Gas(LPG) ne’ebe produs iha Area Bayu Undan iha Timor-Leste.
Hanesan parte kontribuisaun ba dezemvolvimentu rekursus humanu iha Timor-Leste, komesa 2015, Astomos fo ajuda fundus ba estudante nain 20 husi fakuldade ne’ebe la hanesan iha UNTL, Astomos mos fo treinamentu tempu badak (Short-term) ba estudante nain 2 iha Japaun.
Programa Bolsu estudu ida ne’e, sei kontinua to’o 2018, mai hanesan parte ida husi nota kompreensaun (Memorandun of Understanding) ne’ebe asina husi Astomos no UNTL iha dezembru 2014, iha ne’ebe objektivu husi Astomos atu kontribui ba dezenvolvimentu rekursus humanu iha Timor Leste atu promove koperasaun no amizade entre Timor-Leste no Japaun.
Iha serimonia award ida ne’e Sr. Osamu Masuda ne’ebe hanesan prejidente Astomos mos hato’o nia perspektiva katak nia komprende katak Timor-Leste koko atu dezenvolve rekursus humanus ba nasaun iha future, nia hare no espera katak ho bolsu estudu ida ne’e bele hametin tan relasaun entre Timor Leste no Japaun.
Alem ne’e hato’o mos apresiasaun no agradesimentu husi Ministra Interina Educação Sra. Dulce de Jesus Soares, ba programa bolsu estudu ida ne’e. “ Planu ne’ebe UNTL halo dadaun kona ba Bolsu Estudu ida ne’e diak tebes, no ida ne’e mos fó opiniaun diak ba Ministeriu Edukasaun atu hare’e katak la’os de’it ami atu haruka bolsu estudu ba estranjeiru maibe atu hare’e mos ba estudante sira ne’ebe ho notas no dezenpeñu diak, nia merese duni atu hetan motivasaun ruma atu nia bele kontinua nia estudu ho diak no Ministeriu Edukasaun wainhira fó Scholarship ita la hare’e ba se deit maibe povu Timor oan hotu iha direitu hanesan .” hateten Sr. Vice Ministra.
No mos hatutan tan katak nia agradese no kongratula tebes ba UNTL tamba programa ne’e maske la’os primeira vez maibe nia hateten katak ho nia prejensa nia hare’e programa ida ne’e kapas teb-tebes no nia sei nafatin monitorija ba programa hanesan ne’e.
Iha parte seluk, Magnifiku Reitor UNTL Prof. Doutor Fransisco Miguel Martins, “ Bolsu Estudu ida ne’e fó para atu enkoraja sira atu estuda maka’as liu tan, atu esforsu no eleva sira nia kualidade iha sira nia area ida-idak, bolsu estudu ida ne’e laos atu fó hanesan kuitadu maibe fó tamba sira nia prestasaun akademika ne’ebe mak a’as no enkoraja sira para aumenta tan sira nia kualidade ne’e ba nivel ne’ebe a’as, ida ne’e maka husi kompañia Japaun ne’ebe liu husi Astomos Energy ne’e mai fó scholarship ne’e atu suporta sira.” Hateten Reitor.
Iha programa ida ne’e asiste mos husi Vice-Decanu ba assuntus estudantes, FECT Sr. Vital Cruz Malai de Arauju Vilanova, hato’o nia persepsaun no expectiva kona ba estudante Engenharia ne’ebe simu Astomos Scholarship katak ba estudante sira merese duni atu hetan bolsu estudu husi Astomos Energy Coorporation.
“Estudante ne’ebe hetan ne’e sira ne’ebe iha hakarak esforsu a’an para estuda nomos valor sira ne’ebe hetan ne’e ho sira nia esforsu duni, no tau fiar katak bolsu estudu ne’ebe sira hetan, bele utiliza ba apoiu sira nia estudu liu-liu ba sira ne’ebe hetan ne’e ho nivel ne’ebe la hanesan, portantu ami espera katak ida ne’e bele apoiu sira. Alem husi Astomos no mos husi parte Osaka Gas nian, ami mos sei buka tan bolsu estudu sira seluk hodi nune’e bele motiva estudante sira no sei planu para bele iha aktividade ba estudante sira hanesan halo semináriu, halo exposisaun atu sira bele hatudu no promove sira nia a’an, tamba buat ida ne’ebe hanesan inimigu a’at iha ita nia moris mak “tauk no moe” ne’e. Tan ne’e ami espera katak iha parte gabinete nian ami sei planu no kria aktividade estudu barak atu nune’e estudante sira bele halakon sira nia “tauk no moe” ne’ebe iha hodi avansa ba oin.” Hatutan Sr.Vital.
