|
|
Liceu- Governu Japaun Liu husi Astomos Energy corporation ho Universidade Nasional Timor Lorosa’e fo Bolsu estudu ba Estudante ne’ebe hetan valor di’ak liu iha UNTL iha auditorium, tersa(26/04/2016).
Estudante bolseiru hamutuk nain 20 mai husi Fakuldade ne’ebe diferente ne’ebe eziste iha UNTL, tuir estudante bolseiru Inocencio dos Reis Costa Maria husi Departamentu Construsaun Civil, Faculdade Engenharia, Ciência e Tecnologia-FECT katak “ hau senti kontenti teb-tebes tamba pessoalmente hau nu’udar ema primeiru ne’ebe primeira vez hetan bolsu estudu husi Astomos Scholarship ida ne’e, hau apresia no senti katak buat sira ne’ebe membru kompetente sira hala’o dadaun ne’e diak no fó benefisiu tebes ba estudante sira liu-liu iha UNTL. Hau husu ida ne’e atu kontinua nafatin ba oin atu nune’e bele motiva mos estudante sira atu hakas a’an no prepara a’an didiak ho notas ne’ebe diak atu nune’e bele hetan mos bolsu estudu hanesan ami nain 20 ne’ebe ohin loron hetan. No hau mos sei esforsu a’an makas atu bele kontinua hetan nafatin bolsu ida ne’e, tan ne’e hau sei prepara diak liu tan, liu-liu iha area estuda nian atu nune’e bele hetan notas ne’ebe tuir kriteria hodi bele kontinua simu nafatin bolsu husi kompania ne’ebe refere”.
Objektivu husi bolsu estudu ne’e hanesan parte kontribuisaun ba dezenvolvimentu Timor-Leste nian no atu hametin tan amizade entre nasaun rua ne’e. Programa bolsu estudu sei kontinua to’o tinan 2018 bazeia ba akordu ne’ebe asina ona husi Astomos no UNTL.
