|
|
Quarta Feira(27/04/2016) Osaka Gas Foundation no Universidade Nacional Timor Lorosa’e hala’o Serimonia Apresentasaun Bolsu Estudu ba estudante 20 husi Faculdade Engenharia, Ciência e Tecnologia-FECT.
Osaka Gas Foundation of Cultural International Exchange (OGFICE), Diretor: Takashi Sakai, Advisor ba Osaka Gas Cooperation, Japan International Cooperation Agency (JICA) no Universidade Nacional Timor Lorosa’e (UNTL) hala’o serimonia apresentasaun bolsu estudu iha Auditorium iha 27 Abril 2016. Partisipante sira ne’ebé partisipa besik 100 inklui Reitor, Dekanu, Professores, kandidatu ba bolsu estudu ho sira nia parente sira, representante husi governu, membru parlamentu, Embaixada Japaun iha Timor-Leste, JICA, OGFICE.
OGFICE estabelese iha 1992 husi Osala Gas atu haklean kompriensaun (mutual understanding) iha area Sudueste Asiátiku iha nasaun sira ne’ebé produz gas natural no halo mudansa iha area ne’ebé relasiona ho edukasaun kada tinan. Komesa husi ninia estabelesementu iha tinan 1992 to’o 2015, aproximadamente total orsamentu durante tinan 24 mak millaun 457 Yen (JPY).
OGFICE hahu programa bolsu estudu iha Timor-Leste iha 2012 no fó apoiu finansas hamutuk 10.000 USD ba estudante 20 husi Faculdade Engenharia Ciência e Tecnologia UNTL ba kada tinan. Adisionalmente iha Juliu 2013, OGFICE enkaixa mos programa treinamentu tempu badak (sort-term training) ba docente nain rua husi Fakuldade Engenharia, UNTL. Aktividade sira ne’e rejista ona hanesan programa komemorativu hodi selebra désimu aniversáriu ba relasaun diplomatiku entre Japaun ho Timor-Leste “tinan 2012 mak tinan ba amizade no paz entre Japaun ho Timor-Leste”.
Iha 2016, OGFICE planu atu kontinua implementa programa bolsu estudu ba Indonesia, Malaysia, Timor-Leste no total fundus ba tinan ne’e mak rihun 215 USD. Husi orsamentu ne’e rihun 40 USD sei aloka ba Timor-Leste hodi suporta programa bolsu estudu ba estudante no treinamentu ba tempu badak (sort-term training) iha Japaun ba docente nain rua husi fakuldade Engenharia UNTL (hanesan 2015).
Liu husi programa edukasaun iha Timor-Leste no nasaun Sudueste Asiátiku sira seluk, OGFICE sei promove programa International Exchange liu tan ne’e mak atu hari’i amizade no parseiru ne’ebé forte entre Japaun ho nasaun sira seluk iha future.
