FECT

DILI, 24 Maiu 2024, (fect.untl.edu.tl) - Xefe Estadu José Ramos-Horta, kondekora órden Timor-Leste nian ba sidadaun nasionál no internasionál inklui profesór doutoradu husi Fakuldade Enjiñaria UNTL nu'udar símbolu apresiasaun ne'ebé kle'an ba dedikasaun no servisu sira ne'ebé ema ida-idak halo hodi hadi'ak Timor-Leste.

Profesór doutoradu husi Fakuldade Enjiñaria UNTL nian hamutuk na’in-12 simu Kondekorasaun ho kategoria Grau Medalla bá ordém Timor-Leste, Premiu kondekorasaun ne’e rasik hetan asinadu husi Prezidente Repúblika, José Ramos-Horta, iha Palásiu Nobre Lahane, Dili, Domingo (19/05/2024).

Iha Serimónia agradesimentu ne’e Magnífiku Reitor nia reprezentante Vise-reitór ba Asuntu Akadémiku no Garantia Kualidade Profesór Samuel Venâncio de Sousa Freitas, hato’o no fahe sentimentu orgullu no kontente ba Profesór na’in-12

“Reitoria compartide sentimentu dé orgulho no kontente boot bele partisipa iha eventu ne’ebé mak fó dignidade no dedikasaun ba ita-nia kondekorados nain-12, ho orgullu ida ne’e orgullu fakuldade nian, orgullu UNTL nian to’o ba Familia sira tomak. Normalmente iha Nasaun ida demokrátika ida hanesan ita nian, rekoñesimentu ba ema ne’e prosesu ida é orgullu boot liu no obreza as liu kuandu rekoñesimentu ne’e ba Professores Doutores, Nia razaun barak ne’ebé mak professores nia dezempeñu importante tebes no sira nia kontribuisaun ne’e presiza atu ita rekoñese. Hare ita-nia Doutores nain-12 husi Fakuldade Enjiñaria nia kontribuisaun no dedikasaun ba Fakuldade iha Ensinu Aprendizajen, Tripla misaun, Transferensia koñesimentu ba sosiedade no ba Desenvolvimentu Nasaun ida ne’e durante tinan hira nia laran, ema hotu-hotu konsiente ho ida ne’e, ho rekoñesimentu ida ne’e importante tebes no valoriza ita UNTL liu husi Fakuldade nu’udar Instituisaun no mós nu’udar elementu individuál,” Vise-reitór hateten.

Vise-reitór hateten Fakuldade Enjiñaria sai role model tanba Departamentu Engenharia Sivil hetan akreditasaun A iha nivel nasionál no úniku iha UNTL

“Fakuldade Enjiñaria kleur tiha ona sai Role model iha UNTL, pesoalmente nu’udar Vise-Reitor hare ida ne’e, se karik prova ita rasik hare Departamentu Enjiñeria Sivil hetan akreditasaun A iha nivel nasionál no úniku iha UNTL, inklui haree husi inovasaun no dizitalizasaun ne'ebé lidera husi produtu ida husi Fakuldade Enjiñeria mak Profesór Frederico Soares Cabral ne’ebé agora daudaun dijitaliza ona fakuldade sira seluk, nune’e mós iha infraestrutura ne’ebé adekuadu no avansadu,” Vise-reitór hateten.

Iha fatin hanesan, Dekanu FEST-UNTL Profesór Adalfredo Ximenes hato’o sentimentu agradesimentu ba Presidente Repúblika tanba bele rekoñese no fó kondekorasaun ba Doutor nain-12 iha UNTL.

“Sente orgullu boot ida ba FEST tanba nia doutór na’in 12 simu kondekorasaun husi Presidente Repúblika, ita hotu agradese ba Presidente Repúblika tanba kondekora doutór nain-12 husi FEST, lahaluha ita mós fó agradese ba JICA Timor-Leste ne'ebé apoia ona FEST no fó espasu ba dosente sira ba kursu iha Japaun hodi hasai doutoramentu no agradese mós ba Embaixador Portugal ne’ebe fó mós oportunidade kursu doutoramentu ba dosente sira hodi bele kontinua sira nia estudo iha Portugal” Dekanu Fakuldade Enjeñaria UNTL, Adalfredo Ximenes, hateten iha diskursu Selebrasaun kondekorasaun ba Professór Doutorado nain-12 simu iha Palásiu Nobre Lahane, Dili, Domingo (19/05/2024).

Partisipa iha serimónia agradesimentu ne’e, Vise-reitór UNTL, Pro-reitór UNTL, Docentes, Funsionáriu, Estudante, Família no konvidadu sira.