Laboratoriu Departamentu Engenaria Mecanica

Laboratoriu iha Departamentu Enjenaria Mekánika mak fasilidade importante ida ne’ebé suporta prosesu aprendizajen, prátika, peskiza no dezenvolvimentu iha área Enjenaria Mekánika. Laboratoriu fornese ambiente ne’ebé estudante, dosente no peskizadór sira bele aplika koñesimentu teóriku ba atividade prátika, liuhusi esperimentu, teste, observasaun no análize kona-ba sistema no ekipamentu mekaniku.

Iha laboratoriu, estudante sira bele aprende no komprende prinsipiu importante sira iha Enjenaria Mekánika, inklui mekánika, termodinámika, mekanika fluídu, transferénsia de kalor, materiál, prosesamentu no manufatura, sistema mekaniku no automasaun. Atividade prátika ajuda estudante sira atu komprende oinsá prinsipiu sientífiku no tékniku sira aplika iha dezenhu, konstrusaun, operasaun no manutensaun ekipamentu no sistema mekaniku.

Laboratoriu mos importante atu dezenvolve habilidade iha uza ekipamentu, instrumentu medisaun no makina. Estudante sira bele aprende kona-ba prosedimentu operasaun, seguransa laboratoriu, manutensaun no maneira apropriada atu halo medisaun no kolekta dadus. Dadus ne’ebé hetan husi esperimentu bele analiza atu kompara ho teoria no determina rezultadu ne’ebé relevante ba problema tékniku.

Aleinde atividade aprendizajen, laboratoriu iha Departamentu Enjenaria Mekánika bele suporta peskiza no inovasaun. Peskiza sira bele foka ba área hanesan enerjia renovável, efisiénsia enerjétika, dezenhu no otimizasaun sistema mekaniku, manutensaun makina, refrijerasaun no sistema térmiku, automasaun no dezenvolvimentu teknolojia ne’ebé apropriadu ba nesesidade lokal.

Laboratoriu mos bele sai espasu ba estudante sira atu dezenvolve projetu prátiku no rezolve problema real. Liuhusi atividade hanesan dezenhu no konstrusaun protótipu, teste makina, análize materiál no sistema mekaniku, estudante sira bele hasa’e kapasidade kreativa, pensamento krítiku no habilidade rezolve problema.

Ho fasilidade no ekipamentu ne’ebé apropriadu, laboratoriu iha Departamentu Enjenaria Mekánika bele kontribui ba formasaun profisionál Enjenaria Mekánika ne’ebé iha kompeténsia téknika, disiplin, responsabilidade no prontidaun atu servisu iha setor industriál, konstrusaun, manutensaun, enerjia, manufatura no área téknika seluk. Nune’e, laboratoriu la'ós de'it fatin ba prátika akademika, maibé mos sai hanesan parte importante husi prosesu aprendizajen, peskiza no preparasaun estudante atu kontribui ba dezenvolvimentu teknolojia no infraestrutura iha Timor-Leste.