Fakuldade Enjeñaria, Siénsia no Teknolojia (Siglá Portugéz FECT) liuhusi Asosiasaun Akadémika Estudante (AAE-FECT) nian hamutuk ho Komisaun Organizadora (KO) ba Atividade Estrakurrikulár “𝐄𝐧𝐠𝐢𝐧𝐞𝐞𝐫𝐢𝐧𝐠 𝐆𝐚𝐦𝐞𝐬 𝟐𝟎𝟐𝟔” realiza Kompetisaun Modalidade Diskursu Públiku ne’ebé hala’o durante loron 08-09 Juñu, iha Auditóriu Fakuldade Enjeñaria, Hera, Dili.
Iha loron primeiru, kompetisaun ne’e hahú ho faze eliminasaun ne’ebé partisipa husi estudante na’in 18 husi departamentu lima ne’ebé iha Fakuldade ne’e. Estudante sira aprezenta no diskute kona-ba tópiku “𝗔𝗻𝗮𝗹𝗶𝘇𝗮 𝗧é𝗸𝗻𝗶𝗸𝘂 𝗞𝗼𝗻𝗮-𝗯𝗮 𝗠𝘂𝗱𝗮𝗻𝘀𝗮 𝗞𝗹𝗶𝗺á𝘁𝗶𝗸𝗮: 𝗘𝗻𝘁𝗿𝗲 𝗗𝗲𝘇𝗮𝗳𝗶𝘂 𝗻𝗼 𝗦𝗼𝗹𝘂𝘀𝗮𝘂𝗻 𝗔𝗸𝗮𝗱é𝗺𝗶𝗸𝗮 𝗯𝗮 𝗔𝗱𝗮𝗽𝘁𝗮𝘀𝗮𝘂𝗻 𝗻𝗼 𝗠𝗶𝘁𝗶𝗴𝗮𝘀𝗮𝘂𝗻 𝗶𝗵𝗮 𝗧𝗶𝗺𝗼𝗿-𝗟𝗲𝘀𝘁𝗲” ne’ebé foka ba dezafiu sira husi mudansa klimátika no kontribuisaun akadémika sira ba esforsu adaptasaun no mitigasaun iha Timor-Leste.
Bazeia ba rezultadu avaliasaun juri nian kona-ba kualidade argumentu, domina matéria, abilidade analítiku, no téknika aprezentasaun, estudante na’in 13 mak eliminadu iha loron primeiru, enkuantu estudante na’in 5 susesu avansa ba faze finál ne’ebé hala’o iha loron segundu.
Iha faze finál, finalista sira aprezenta tópiku “𝗣𝗮𝗽𝗲𝗹 𝗙𝗘𝗖𝗧-𝗨𝗡𝗧𝗟: 𝗜𝗻𝗼𝘃𝗮𝘀𝗮𝘂𝗻 𝗻𝗼 𝗧𝗿𝗮𝗻𝘀𝗳𝗼𝗿𝗺𝗮𝘀𝗮𝘂𝗻 𝗘𝗻𝗴𝗲𝗻𝗵𝗮𝗿𝗶𝗮 𝗠𝘂𝗹𝘁𝗶𝗱𝗶𝘀𝗶𝗽𝗹𝗶𝗻𝗮𝗿 𝗯𝗮 𝗙𝘂𝘁𝘂𝗿𝘂 𝗧𝗶𝗺𝗼𝗿-𝗟𝗲𝘀𝘁𝗲” ne’ebé foka ba papél estratéjiku FECT-UNTL nian hodi enkoraja inovasaun no transformasaun multidisiplinár ba futuru dezenvolvimentu Timor-Leste nian.
Hafoin prosesu avaliasaun komprensivu hosi painél juri sira mak anunsia, 𝐀𝐲𝐜𝐡𝐚 𝐅𝐫𝐚𝐧𝐜𝐢𝐬𝐜𝐚 𝐓𝐚𝐯𝐚𝐫𝐞𝐬 𝐒𝐨𝐚𝐫𝐞𝐬, hosi Departamentu Jeolojia no Petróleu, kontinjente 2026, mak sai nu'udar manan nain iha kompetisaun ne’e. Susesu ida-ne'e hatudu nia abilidade akadémika, lideransa intelektuál, no abilidade komunikasaun públiku ne'ebé exelente hodi hato'o ideia no solusaun sira ba kestaun dezenvolvimentu nasionál.
Manan na’in sira ba iha kompetisaun ne’e mak I lugar Aycha Francisca Tavares Soares husi Departamentu Jeolojia no Petróleu, kontinjente 2026, II Deonisia Maria Alicia Viana Gustmão husi Departamentu Enjeñaria Eletrónika no Elétrika, kontinjente 2026, III Lugar Mateus Soares de Jesus husi Departamentu Enjeñaria Sivil, kontinjente 2026, no IV Lugar Margensio Delito Fernandes husi Departamentu Enjeñaria Informátika, kontinjente 2025.
Objetivu husi realiza kompetisaun Diskursu Públiku ida ne’e atu dezenvolve kapasidade estudante sira nian iha área komunikasaun akadémika, lideransa, no hanoin krítiku kona-ba asuntu estratéjiku nasionál sira.
Nu’udar parte ida husi atividade sira iha Engineering Games 2026 nian, Asosiasaun Akadémika Estudante Fakuldade Enjeñaria aprezenta modalidade tolu ne'ebé dezeña atu akomoda dezenvolvimentu kapasidade estudante nian iha kampu akadémiku no desportu. Modalidade tolu ne’e inklui Futeból, ne’ebé oras ne’e la’o hela no hakat ona ba faze finál; Futsal, ne’ebé oras ne’e iha ona faze rejitrasaun; no Diskursu Públiku, ne’ebé realiza ona ho susesu no fó espasu ba estudante sira atu hatudu sira-nia abilidade analítiku, argumentasaun, no lideransa intelektuál iha diskusaun asuntu estratéjiku sira ne’ebé relevante ba dezenvolvimentu nasionál no futuru FECT-UNTL nian.
