Fakuldade Enjeñaria, Siénsia no Teknolojia (Siglá Portugéz FECT) nia konsellu diretiva reuniaun ho ekipa auditoria husi JICA (Japan International Cooperation Agency) ne’ebé mai husi nasaun Japaun.
Atividade Reuniaun ne'e, hala'o iha Fakuldade Enjeñaria, Hera (13/03), durante loron ida tomak ho sesaun sira mak diskusaun iha tempu dader no iha tempu lokraik hala’o vizita ba fasilidade akadémika nian, ekipamentu laboratóriu, mákina sira no inklui Instalasaun Painél Solar PV ne’ebe instala tiha ona iha Fakuldade Enjeñaria.
Objetivu husi reuniaun ne’e hodi diskute no halo revizaun, inspesaun no avaliasaun ba utilizasaun fasilidade akadémika nian, ekipamentu laboratóriu, no mákina sira ne’ebé antes ne’e JICA fornese ona ba fakuldade liuhosi kooperasaun entre instituisaun rua ne’e.
Iha sesaun diskusaun, ekipa auditoria hamutuk ho konsellu diretiva fakuldade nian diskute kona-ba to'o iha ne'ebé maka fasilidade sira-ne'e utiliza hodi apoia atividade akadémika sira, inklui prosesu aprendizajen, peskiza, no prátika estudante sira-nian.
Hafoin sesaun diskusaun remata, atividade kontinua ho vizita ba fatin ba laboratóriu sira iha Fakuldade Enjeñaria no hare mos Instalasaun Painél Solar PV ne’ebé instala iha Fakuldade ne’e. Durante vizita ne’e, ekipa auditoria, hamutuk ho dirijente fakuldade, halo inspesaun diretamente ba fasilidade, ekipamentu, no mákina sira ne'ebé fornese liuhosi apoiu JICA no observa oinsá fasilidade sira-ne'e uza iha atividade akadémika no peskiza.
Reuniaun auditoria no vizita ne’e halo parte iha mekanizmu avaliasaun kooperasaun ne’ebé hala’o periodikamente, iha ne’ebé atividade auditoria ne’e hala’o kada tinan lima nu’udar forma monitorizasaun ba implementasaun programa asisténsia no dezenvolvimentu kapasidade institusionál.
Liuhusi reuniaun no vizita ne’e, fakuldade enjeñaria garantia katak kolaborasaun entre JICA no UNTL bele kontinua la’o di’ak no sei fó impaktu pozitivu ba hasa’e kualidade edukasaun, peskiza, no dezenvolvimentu teknolojia iha Fakuldade Enjeñaria UNTL.
Partisipa iha reuniaun ne’e Diretór JICA nian iha Timor Leste, Sr. Daisuke Fukumori, Advisor for Establishing a Graduate School of Engineering at UNTL, Sr. Kenichiro Komatsu, no asistente tékniku no ekipa husi JICA nian.
