Fakuldade Enjeñaria, Siénsia no Teknolojia (Siglá Portugéz FECT) hala’o ensaiu preparasaun ba orientasaun akadémika ba estudante foun sira iha tinan 2026 ne’ebé organiza husi Asosiasaun Akadémika Estudante (AAE-FECT-UNTL) hamutuk ho Komisaun Organizadóra Orientasaun Akadémika ba tinan 2026 nian (KOOA-FECT-UNTL), ne’ebé realiza iha kampus Fakuldade Enjeñaria, iha loron 24 fulan-Marsu tinan 2026.
Objetivu hosi ensaiu ne’e nu’udar preparasaun hodi fahe informasaun sira kona-ba programa orientasaun nian atu nune’e estudante sira bele hatene no prepara didi’ak ba iha atividade orientasaun ne’e, atu nune’e atividade orientasaun sira bele la'o ho sistematiku, efetivu, no tuir padraun akadémiku sira ne'ebé estabelese ona.
Atividade ba ensaiu ne’e hahú iha tuku 7:00 dadeer ne’ebé hahu uluk ho prosesu verifikasaun prezensa estudante foun sira nian liu husi lista prezensa, tuir fali ho informasaun internu hosi komisaun sira. Iha sesaun prinsipál, estudante foun sira hetan akompañamentu husi komisaun no Asosiasaun Estudante Departamentu (Nukleu) sira husi departamentu ida-idak ba iha sira ida-idak nia sala de aula. Iha sala de aula, estudante sira simu introdusaun sira ne'ebé kobre departamentu nia estrutura organizasaun, organizasaun estudante sira, kurríkulu akadémiku, no programa no atividade oioin ne'ebé la'o hela no sei iha planu nia laran. Hafoin konklui iha sala de aula laran, atividade sira kontinua ho hamoos kampus ka limpeza hamutuk iha kampus fect no kampu futebol FECT nian. Hafoin limpeza hamutuk remata, tuir mai mak estudante sira hotu ba iha auditóriu hodi rona aprezentasaun no informasaun sira kona-ba implementasaun orientasaun akadémika.
Bazeia ba dadus rejistrasaun estudante sira mai iha Fakuldade Enjeñaria ne’e, totál estudante foun ne'ebé halo rejistrasaun hodi tuir orientasaun akadémika iha tinan 2026 atinji na’in 417, ne'ebé kompostu hosi estudante mane na’in 224 no feto na’in 193. Distribuisaun estudante sira nian mós espalla iha departamentu oioin iha Fakuldade Enjeñaria nia laran, ne'ebé reflete interese ne'ebé buras iha enjeñaria no siénsia entre jerasaun foun sira.
Atividade ba Orientasaun Akadémika ba estudante foun sira sei hala’o iha loron 24-28 Marsu 2026.
Espera katak liuhusi atividade ne’e, estudante foun sira bele adapta ba ambiente akadémiku ho di'ak no iha komprensaun forte ba sistema edukasaun no vida kampus iha UNTL, liuliu iha Fakuldade Enjeñaria.
