Fakuldade Enjeñaria, Siénsia no Teknolojia (Siglá Portugéz FECT) nia Departamentu Kursu Mestradu Enjeñaria, ne’ebé lidera husi Profesór Valerio de Sousa Gama, Ph.D, hamutuk ho Estrutura Fakuldade no reprezentante Japan International Cooperation Agency (JICA), atuál Asesór Sénior JICA, Dr. Masahiko Sekine, realiza Orientasaun Akadémika 2026 ba estudante foun na’in-23 iha Área kursu Mestradu Enjeñaria iha Kampus Fakuldade Enjeñaria, Hera, Díli (27/02).
Atividade Orientasaun ne’e, hetan abertura husi, Visereitór ba Asuntu Pós-Graduasaun no Peskiza, Profesór Vicente de Paulo Correia, Ph.D, ho sesaun sira hala'o durante loron ida iha Sexta, 27 Fevereiru 2026.
Objetivu husi Orientasaun ne’e atu bele fó koñesementu ba estudante foun sira kona-ba atividade akadémika, kurríkulu, asesu ba fasilidade sira, oportunidade sira hodi asesu ba bolsa estudu, no ambiente ka natureza estuda iha UNTL liu liu iha FECT.
Partisipa husi Dekanu Fakuldade Enjeñaria, Profesór Adalfredo G. da Silva Ximenes, Advisor for Establishing a Graduate School of Engineering at UNTL, Mr. Komatsu, diretór departamentu sira iha kursu lisensiatura nian, dosente, no estudante sira.
