Faculdade de Engenharia Ciência e Tecnologia (FECT), realiza semináriu nasionál TAJST (Timorese Academic Journal of Science & Technology) ba Edisaun da sia (9) nian ho tema "The Academic Role in Participating and Contributing to National Development", iha Auditóriu Fakuldade Enjeñaria, Hera, Díli (19/11).
Iha diskursu abertura Vise-dekanu ba Asuntu Kooperasaun no Peskiza, Profesór Dr. Leandro Madeira Branco hatete, responsabilidade nu'udar akadémiku sira nian la'ós de'it hanorin no produz graduadu sira, maibé inklui mós hala'o peskiza signifikativu, dezenvolve ideia inovativu sira, no kontribui atu rezolve dezafiu reál sira ne’ebé sosiedade no nasaun ne’e hasoru.
"Tema ba semináriu ida ne’e fó hanoin mai ita katak ita-nia responsabilidade nu’udar akadémiku la’ós de’it hanorin no produz graduadu sira. Ita mós tenke hala’o peskiza ne’ebé signifikativu, dezenvolve ideia inovativu sira, no kontribui atu rezolve dezafiu reál sira ne’ebé ita-nia sosiedade no ita-nia rain hasoru", dehan Profesór Dr. Leandro.
Hafoin remata sesaun sira, iha diskursu enseramentu reprezentante Dekanu FECT, no atuál Diretór Kursu Mestradu Enjeñaria, Profesór Dr. Valerio de Sousa Gama subliña importánsia atu hasa'e envolvimentu estudante sira nian iha peskiza no publikasaun sientífika sira. Nia enkoraja estudante sira atu la'ós de'it kompleta sira nia estudu lisensiatura ka teze mestradu sira hanesan ezijénsia akadémika, maibé mós atu dezenvolve sira nia deskobrimentu peskiza nian ba artigu sientífiku sira hodi publika iha jornál akadémiku sira.
"Ami enkoraja estudante sira husi kursu mestradu sira atu hakerek no submete sira nia peskiza ba jornál sientífiku sira molok remata sira nia estudu akadémiku sira. Ho maneira ida ne'e, deskobrimentu sira peskiza nian ne'ebé produz durante sira nia estudu sei la'ós de'it halo parte iha rekizitu sira teze nian maibé sei kontribui mós ba dezenvolvimentu siénsia no teknolojia nian", Profesór Dr. Valerio hatete.
Profesór Dr. Valerio subliña liután katak publikasaun sientífika maka parte krusiál ida hodi harii kultura akadémika no hadi'a kualidade peskiza. Liuhusi publikasaun, rezultadu peskiza sira mak ema bele hatene, kompriende no aprende, atu nune’e bele fó benefísiu ba komunidade, no sai hanesan referénsia ba dezenvolvimentu peskiza sira tuirmai.
Semináriu ne’e sai hanesan forum akadémiku ba dosente, peskizadór, estudante, no komunidade akadémika hodi aprezenta rezultadu peskiza, fahe koñesimentu, haforsa rede akadémika, no dezenvolve kolaborasaun peskiza ne’ebé orienta ba nesesidade no dezafiu dezenvolvimentu nasionál.
Iha TAJST Volume 9 ne’e, artigu sientífiku hamutuk 39 maka submete ba review. Husi sira-ne'e, 30 maka passa no aseita ba publikasaun no aprezentasaun. Atinjimentu ida-ne'e hatudu peskizadór sira-nia partisipasaun hodi apoia dezenvolvimentu publikasaun sientífika sira liuhosi TAJST. Iha TAJST Volume 9 ne’e, estudante kursu mestradu na'in rua mos aprezenta sira nia rezultadu peskiza teze mestradu nian iha semináriu ida ne’e.
Partisipa husi Vice-Reitór Para os Assuntos Académico Prof. Dr. Câncio Monteiro, Pro-Reitor para os Assuntos de Planeamento, Monitorização e Avaliação (PRAPMA) Profesór Tomas Soares Xavier, Proreitór ba Asuntu Dezenvolvimentu no Infraestrutura (PRADI), Profesór Alfredo Ferreira, Dekanu FECT, Profesór Adalfredo G. da Silva Ximenes, Asesór Sénior JICA, Dr. Masahiko Sekine, Advisor for Establishing a Graduate School of Engineering at UNTL, Mr. Komatsu, liña ministériu sira, estudante kursu lisensiatura, estudante kursu mestradu, no dosente FECT.