Fakuldade Enjeñaria, Siénsia no Teknolojia (Siglá Portugéz FECT) nia Estrutura sira, simu vizita husi National Institute of Information and Communication Technology (NICT-Japaun) nia Diretór ba International Research Development Office Global Alliance Department Mr. Hiroshi Emoti, iha Campus Fakuldade Enjeñaria, Hera (25/03).

Objetivu husi vizita ida ne’e, NICT-Japaun hakarak atu observa diretamente kondisaun reál fakuldade nian, inklui infraestrutura, fasilidade, no laboratóriu sira ne’ebé uza iha prosesu aprendizajen no peskiza.

Vizita ne’e foka liuliu ba Departamentu Enjeñaria Informátika, ne’ebé mak sai nu’udar programa estudu estratéjiku ida iha dezenvolvimentu transformasaun dijitál iha UNTL. Liuhusi vizita ida-ne'e, NICT hakarak atu hetan vizaun jerál ida ne'ebé komprensivu kona-ba nesesidade no potensiál dezenvolvimentu nian, ne'ebé bele sai hanesan baze ida ba kolaborasaun ne'ebé intensivu liután iha futuru.

Atividade ida ne’e hanesan parte ida husi esforsu ida atu hametin kooperasaun internasionál iha área teknolojia informasaun no komunikasaun nian, partikularmente ba apoiu ba dezenvolvimentu kapasidade akadémika no peskiza nian iha ambiente FECT nia laran.

Akompaña iha vizita ida ne’e husi Proreitór ba Asuntu Informatizasaun Transformasaun Dijital no Inovassun (PRAITDI) nian, Profesór Frederico Soares Cabral, Visedekanu ba Asuntu Akadémiku FECT, Profesór José Soares Pinto, Visedekanu ba Asuntu Administrasaun no Finansas FECT, Profesór Marfim Guimaraes, no ekipa husi NICT nian.