Fakuldade Enjeñaria, Siénsia no Teknolojia (Siglá Portugéz FECT) nia Dekanu Profesór Adalfredo G. da Silva Ximenes hamutuk ho Konsellu diretiva sira, realiza Jantar de Confraternização no Despedida ba Profesór peritu sira husi Japaun, iha salaun Restaurante Pro-Ema, Bidau Lecidere, Díli (27/03).

FECT Liu husi nia kooperasaun ho JICA ba iha Projetu CADEGRADE (Capacity Development of Graduate Education of Engineering) kona-ba fo kapasitasaun ba dosente sira iha FECT liuliu dosente sira ne’ebé suporta no hanorin iha kursu Mestradu, relasiona ho peskiza husi dosente no mos peskiza husi estudante mestradu sira. Iha fulan ida ne’e, Profesór peritu sira ne’e remata ona sira nia kapasitasaun ka treinamentu ba dosente no estudante kursu mestradu sira, no iha loron 27 Fulan-Marsu 2026 Fakuldade realiza serimonia despedida liu husi jantar de confraternização.

Programa kapasitasaun ne’e sei nafatin kontinua no tinan tinan profesór peritu sira husi Japaun sei mai fali hodi fo kapasitasaun, treinamentu, no apoiu peskiza ba iha dosente sira no mos estudante kursu mestradu sira.

Partisipa husi Magnífiku Reitór UNTL, Profesór Dr. Joviano António da Costa M. Eng, Proreitór ba Asuntu Kooperasaun nian, Profesór Cristovão dos Reis, ekipa Diresaun Jerál ba Apoiu Servisu Reitoria (DGSAR), Diretór ba Projetu CADEGRADE, Profesór Sekine Masahiko, no Koordenadór ba Projetu CADEGRADE nian, Sr. Kenichiro Komatsu.