FECT

DILI, 05 Fulan-Agostu 2024, (fect.untl.edu.tl) - Fakuldade Enjiñaria, Siénsia no Teknolojia (Siglá Portugéz FECT) nia Dosente nain-12 ne’ebé antes ne’e ba hala’o Short-term Training iha Japaun durante fulan ida, halo aprezentasaun relatório Short-term Training ba JICA TL Office, Fakuldade Enjiñaria no Kursu Mestradu, iha Sala L5 FECT nian, Díli (01/08). Dosente na'in sanulu-resin-rua husi Fakuldade Enjiñaria ne’ebé foin lalais ne'e fila husi programa Short-term Training iha Japaun, ne'ebé fasilita husi Japan International Cooperation Agency (JICA). Programa ne'e ninia objetivu mak atu hasa'e Dosente sira-nia abilidade hanorin nian no fornese koñesimentu kona-ba metodolojia no teknolojia edukasaun ne'ebé avansadu. Enkuantu durante iha Japaun, Dosente sira hetan mos esperiénsia prátika, koñesimentu, no mós estabelese ligasaun importante ho profisionál sira iha área espesífiku sira. Entretantu, hafoin fila husi Japaun, Dosente sira halo aprezentasaun relatório ba reprezentante JICA, hodi hatudu koñesimentu, prestasaun no esperiénsia ne'ebé Dosente sira hetan durante sira hala’o Short-term Training iha Japaun. Aleinde ne'e, Dosente sira hato'o mos sira-nia agradesimentu ba oportunidade ne’ebé sira hetan hodi ba partisipa iha programa ne'e no subliña impaktu signifikativu ne'ebé sei iha ba sira-nia prátika hanorin no dezenvolvimentu edukasaun Timor-Leste nian. Sr. Kikawa no Sr. Kawanishi fó parabéns ba Dosente sira tanba sira-nia komitmentu no fó atensaun ba JICA nia apoiu ba inisiativa edukasaun iha Timor-Leste. Portantu, Kolaborasaun ida-ne'ebé susesu entre Timor-Leste no Japaun marka pasu signifikativu ida hodi hametin relasaun edukasaun no promove kreximentu profisionál Dosente Timor-oan sira-nian. Partisipa iha aprezentasaun ne'e husi Konsellu diretiva Fakuldade, Project Formulation Advisor, Sr. Hiroshi Kikawa, JICA Advisor for Master Course of Faculty Engineering, Sr. Hiroshi Kawanishi, Diretór Kursu Masteradu, no Dosente sira.