FECT

DILI, 08 Fulan-Jullu 2024, (fect.untl.edu.tl) - Fakuldade Enjiñaria, Siénsia no Teknolojia (Siglá Portugéz FECT) nia Departamentu Enjiñaria Eletrónika no Eletrika (DEEE), dezloka estudante na’in limanulu resin ualu (58) bá Munisípiu Likisa, hodi hala’o estájiu servisu sosiál, hahú husi 8 Fulan-Jullu to’o 19 Fulan-Agustu 2024. Liu husi enkontru ho estudante hirak ne’e iha Sala L2, FECT Hera (08/07), Dekanu FECT-UNTL, Profesór Adalfredo Ximenes, hato'o mos mensagem balun molok dezloka estudante hirak ne’e ba iha fatin estájiu refere. “Nu’udar Dekanu Fakuldade, hato’o ba ita-bot sira atu hatudu ita-bot sira nia karakter no atitude ne'ebé di'ak iha komunidade sira nia leet. Susesu, prestigiu no marka ne'ebé departamentu (DEEE) ne’e iha, labele atu hafoer no hatun. Prestasaun ne'ebé dosentes sira hatudu no dedika ba imi tenki kaer metin no lao tuir. Fakuldade no Departamentu espera husi ita-bot sira wainhira termina estájiu, mak espera ita-bot sira sei hatudu resultadu no asaun positivu iha komunidade sira leet,” Dekanu hateten. Iha fatin hanesan, Diretór Departamentu Enjiñaria Eletrónika no Eletrika (DEEE), Profesór João Guterres, husu mos ba estudante sira atu hala’o tuir saida mak antes ne'e ano turno antes sira hala'o estájiu iha Munisipiu sira. "Desde ano turno sira antes kuandu sira hala'o estájiu, wainhira sira nia tempu estájiu termina, ema sempre agradese, apresia no hamonu matan wen wainhira sira fila. Ne'e signifika katak sira hatudu sira nia atitude ne'ebé di'ak, sira nia servi ba komunidade ho di'ak mak komunidade hadomi sira. Tan ne'e, imi tenki lao tuir no halo tuir saida mak sira halo ona iha komunidade nia leet. Deseju ba imi hotu atu servi ho di'ak no hamutuk hodi kontribui iha komunidade sira," Diretor hateten. Estajiáriu na’in 58 ne’e, fahe ba Grupu rua hodi hala’o estájiu iha Munisípiu Liquiça, Postu-Administrativu Maubara, Suku Vaviquinia no Postu-Administrativu Liquiça Vila, Suku Maumeta.