FECT

DILI, 15 Fulan-Jullu 2024, (fect.untl.edu.tl) - Fakuldade Enjiñaria, Siénsia no Teknolojia (Siglá Portugéz FECT) nia Departamentu Enjiñaria Informátika (DEI), dezloka estudante na’in limanulu resin hitu (57) bá Munisípiu Liquiça, hodi hala’o estájiu servisu sosiál, hahú husi 15 Fulan-Jullu to’o 15 Fulan-Agustu 2024. Antes atu dezloka estudantes hirak ne’e ba iha Munisípu Liquiça, Dekanu Fakuldade Enjiñaria hamutuk ho Estrutura no Dosentes Departamentu Enjiñaria Informátika realiza enkontru ho estudante sira hodi esplika lalaok no regulamentu sira iha tempu estájiu e hato’o mos lia menon ba estudante sira molok dezloka ba Munisípiu Liquiça Liu husi enkontru ho estudante hirak ne’e iha Sala L3, FECT Hera (15/07), Dekanu Fakuldade Enjiñaria hato’o mensagem moral ba estudante sira no husu estudante sira atu lao tuir programa servisu ne’ebé iha. "Hatudu ita nia karakter, komportamentu no edukasaun sivika ne'ebé di'ak nu'udar estudante akademiku iha sosiedade no komunidade nia leet. Ita ema intelektual, ema matenek ita tenki uza ita nia hanoin, lojika no rasiosiniu iha kualker situasaun no kondisaun iha tempu estajiu. Iha etapa estájiu servisu sosiál ida ne'e hotu-hotu tenki lao tuir regra no programa servisu sira ne'ebé iha atu nune'e bele susesu. Atu susesu mak tenki respeita malu, konsidera malu no apoio malu durante iha tempu estájiu." Iha fatin hanesan, Diretór Departamentu Enjiñaria Informátika, Profesór Vosco Pereira, hateten, liu husi estájiu servisu sosiál ida ne’e iha atu estudante sira bele implementa no fahe koñesimentu sira ne’ebé durante sira hetan iha sira nia estudo. "Implementa saida mak durante ne’e imi aprende no hatene hahu husi semester I to’o VII no fahe koñesimentu ne’ebé imi iha. Tenki rona malu, servisu hamutuk no apoio malu para nune’e bele lori susessu iha tempu estájiu ida ne’e" Diretor hateten. Diretór Departamentu ne'e dezeja katak estudante sira sei hala'o sira nia knaar ho di'ak, hamutuk ho autoridade sira, no fahe koñesimentu ne'ebé di'ak atu bele kontribui ba komunidade no instituisaun ne’ebé sira estájiu ba. Estajiáriu na’in 57 ne’e, fahe ba Grupu sanulu resin ida hodi hala’o estájiu iha Munisípiu Liquiça, iha fatin Instituisaun, Suku no Eskola sira hanesan Colégio de Sto. Inácio de Loiola, Ensino Secundário Técnico Vocacional Liquiça, Ensino Secundária Pública “Hu Iso Lara Iso”, Ensino Secundária Católica São João de Brito, Postu Liquiça Vila, Suco Dato, Suco Lauhata, Suco Maumeta, Gabinete PAM, Diresaun iha Munisípiu no PNTL Munisípiu Liquiça. Média : FECT-UNTL