FECT

Dili, Sexta 09 Fulan-Agostu 2024, (fect.untl.edu.tl) - Fakuldade Enjiñaria, Siénsia no Teknolojia (Siglá Portugéz FECT) simu vizita hosi Dr. Choltis Dhirathiti, Diretor Ezekutivu ASEAN University Networking (AUN), hamutuk ho nia delegasaun. Objetivu husi vizita ne'e mak atu observa progresu sira ne'ebé FECT-UNTL halo ona iha preparasaun rekursu umanu nasaun nian molok deklarasaun ofisiál Timor-Leste nian hodi sai membru ASEAN. Durante vizita ne'e, delegasaun AUN hetan aprezentasaun husi Vise-dekanu ba Asuntu Kooperasaun no Peskiza, Profesór Domingos de Sousa Freitas, ne’ebé aprezenta kona-ba potensialidade ka rekursus ne’ebé fakuldade iha liu-liu fasilidade, rekursus humanus, kurikulu, resultadu peskiza, kooperasaun sira no kontribuisaun husi Fakuldade Enjiñaria nian ne’ebé fo benefisiu ba sosiedade no komunidade sira. Iha diskusaun ne'e mos, Dr. Choltis hato'o pergunta importante ida ba Visedekanu ba Asuntu Kooperasaun no Peskiza, Profesór Domingos, kona-ba nia vizaun no aspirasaun ba fakuldade. "Sr. Domingos, Ita-nia mehi ba FECT-UNTL to'o oinsá?" husu Dr. Choltis. Profesór Domingos hatán ho konfiansa: "Ekipa Jestaun FECT-UNTL, ho apoiu husi JICA Timor-Leste, iha komitmentu maka'as atu hasa'e FECT-UNTL ba nivel hanesan Universidade Nasional Singapura (NUS) iha ASEAN ka Universidade Gifu iha Azia. Ami hein katak parte hotu-hotu sei kontinua fó apoiu hodi realiza vizaun ida-ne'e." Hafoin remata enkontru, ekipa ASEAN University Networking halo kedas vizita ba laboratóriu lima iha Fakuldade Enjiñaria: laboratóriu Enjiñaria Sivil, laboratóriu Enjiñaria Eletronika no Eletrika, laboratóriu Enjiñaria Mekanika, laboratóriu Jeolojia no Petroleu, no laboratóriu Enjiñaria Informátika. Iha vizita ba laboratóriu hirak ne’e fó oportunidade ba delegasaun atu observa fasilidade, ekipamentu no teknolojia sira ne'ebé suporta prosesu hanorin no peskiza fakuldade nian. Sira mós halo diskusaun ho dosente no estudante balun kona-ba sira-nia esperiénsia no inovasaun ne'ebé hala'o iha laboratóriu hirak-ne'e. Vizita ida-ne'e marka pasu signifikativu ida ba Fakuldade Enjiñaria atu hasa'e kualidade ensinu superiór iha Timor-Leste, hodi aliña ho vizaun nasaun nian atu sai membru ASEAN tomak. Partisipa iha sorumutu ne’e Vise-Dekanu ba Asuntu Kooperasaun no Peskiza, Profesór Domingos Freitas, Konsellu diretiva Fakuldade, JICA ADVISOR for Master Course, Mr. Hiroshi Kawanishi, Membru unidade kooperasaun FECT, no ekipa Asistente Tékniku AUN.