FECT

Dili, Hera, 16 Fulan-Outubru 2024 - Fakuldade Enjeñaria, Siénsia no Teknolojia (Siglá Portugéz FECT) simu vizita husi delegasaun empreza konstrusaun prinsipál ualu husi Japaun. Vizita ida-ne'e ho objetivu hodi fó sosializasaun kona-ba dezenvolvimentu indústria konstrusaun iha Japaun no introdús mos kona-ba kritériu sira ne'ebé maka tenke prienxe hosi joven enjeñeiru sira husi Fakuldade Enjeñaria nian atu bele tama no serbisu iha empreza sira ne'e. Delegasaun sira ne'e hatete katak Japaun presiza enjeñeiru joven sira ne'ebé iha abilidade téknika no inovasaun, no bele serbisu ho di'ak iha ekipa sira. Aleinde ida-ne'e, kritériu prinsipál ne'ebé maka enjeñeiru potensiál sira tenke prienxe maka tenki hatene ka pelumenus komprensaun báziku lian Japaun. Sira subliña katak abilidade iha lian Japaun nian sei ajuda tebes iha integrasaun no efikásia serbisu iha ambiente serbisu Japaun nian. Dekanu Fakuldade Enjeñaria, Siénsia no Teknolojia, Profesór Adalfredo G. da Silva Ximenes, M.Eng., hato’o agradesimentu ba relasaun di’ak ne’ebé eziste entre Timor-Leste ho Japaun, liuliu hetan apoiu hosi Ajénsia Kooperasaun Internasionál Japaun (JICA). Dekanu dehan, Fakuldade Enjeñaria UNTL koñesidu tebes iha Timor-Leste tanba apoiu husi komunidade Japaun, ne’ebé ajuda ona barak liuhusi kolaborasaun ho JICA. “Ami luta ba ami nia mehi, no imi nia prezensa iha Fakuldade ida ne’e sei ajuda muda ami nia moris ba futuru ida ne’ebé di’ak ba Timor-Leste,” dehan Dekanu Fakuldade Enjeñaria Dekanu hatutan, relasaun entre Japaun ho Fakuldade Enjeñaria UNTL la’ós buat foun, maibé hamutuk ona iha kultura kooperasaun durante tinan barak nia laran. Vizita ne’e, marka kapítulu foun ida iha fakuldade nia istória hodi inspira joven enjeñeiru Timor-Leste sira atu kontinua hateke ba oin. Aleinde ida-ne’e, xefe delegasaun kompañia Japaun nian, Sr. Motoi Sasaki, esplika katak objetivu prinsipál husi vizita ne’e atu loke oportunidade ba estudante Fakuldade Enjeñaria UNTL nian atu ba servisu iha Japaun. Ida ne’e, nia dehan, sei fó dalan ba estudante sira atu aprende, hadi’a no hatudu sira-nia abilidade iha área konstrusaun no enjeñaria nian. Nia subliña mós katak relasaun amizade entre Timor-Leste ho Japaun ne’ebé eziste ona iha tinan barak nia laran sai nu’udar fundamentu importante ba kolaborasaun ida ne’e. "Timor-Leste ho Japaun dezenvolve ona relasaun amizade ne'ebé di’ak iha tinan barak nia laran. Ami prontu atu simu joven enjeñeiru sira hosi Fakuldade Enjeñaria UNTL hodi ba servisu iha Japaun, ho esperansa katak ida ne'e bele hametin liután relasaun entre nasaun rua ne'e," dehan Sr. Motoi Vizita ne’e marka kapítulu foun iha relasaun bilaterál entre Japaun no Timor-Leste, liuliu iha área edukasaun téknika no indústria konstrusaun nian. Fakuldade Enjeñaria UNTL iha esperansa atu kontinua hasa’e kolaborasaun internasionál atu nune’e bele prepara jerasaun enjeñeiru ne’ebé kompetente no prontu atu kompete iha merkadu globál. Partisipa iha vizita ne’e Dekanu, Visedekanu, Konsellu diretiva Fakuldade, JICA ADVISOR for Master Course, Mr. Hiroshi Kawanishi, Docente sira, Xefe Administrasaun, Funsionáriu FECT no Estudante sira.