FECT

Dili, Hera, 07 Outubru 2024 – Fakuldade Enjeñaria, Siénsia no Teknolojia UNTL hala'o serimónia regulár ba Isar Bandeira kada fulan. Eventu ne'e, hala'o iha resintu Fakuldade Enjiñaria nian, partisipa másimu husi Reitor, Visereitór, Proreitór, Diretór Jerál, Diretór Nacional, Dekanu, Visedekanu, Xefe Departamentu, Dosente, Xefe Administrasaun, Funsionáriu no Estudante sira. Responsavél ba serimónia Isar Bandeira ne'e husi Estudante Fakuldade Enjiñeria, Siénsia no Teknolojia UNTL, Hera. Serimónia hahú tuku 8:00 dadeer to’o remata ho diskursu husi Magnífiku Reitór Profesór dr. João Soares Martins MPH, Ph.D, espresa ninia ksolok no orgullu ba realizasaun Isar Bandeira ida ne’e iha Fakuldade Enjeñaria nia laran. Nia hato’o nia apresiasaun ba parte hotu-hotu ne’ebé durante ne’e kontribui, tantu husi ekipa lojístika no parte sira seluk ne’ebé envolve, nune’e eventu ne’e bele la’o ho di’ak no tuir orden. “Ohin kontente teb-tebes tanba Ita bele hamutuk Isar Bandeira iha Fakuldade Enjeñaria fatin ne'ebe furak tebes. Laos halo furak Timor-leste de’it maibe hafurak Fakuldade Enjeñaria, parabéns ba Dekanu ne'ebé mak prepara kondisaun hotu, no ekipa logistika ne'ebé mak servisu ho di’ak, husi kampus sentral no agradese ba koru ne'ebé mak Kanta furak tebes. Ha’u husu ba imi hotu atu mantein morál, tanba importante tebes atu kuda iha imi-nia an rasik, iha instituisaun ida-ne’e, atu nune’e bele kontribui ba sosiedade ne’ebé hadomi pás no hakmatek. "Ida ne’e mós parte ida husi imi-nia kontribuisaun ba dezenvolvimentu nasionál no dezenvolvimentu Universidade Nasionál Timor-Leste nian, nune’e mós hodi hala’o imi-nia misaun sira hanesan peskiza, ensinu no servisu komunitáriu," tenik Magnífiku Reitór. Magnífiku Reitór mos enkoraja estudante sira atu ativu, no dosente sira atu kontinua hasa’e sira-nia nivel edukasaun, husi lisensiatura to’o mestradu no doutoramentu. Serimónia Isar Bandeira Nasionàl ne'e, UNTL hala'o kada fulan dala ida iha Semana dahuluk fulan nian ho razaun prinsipál UNTL nian, sai hanesan símbolu unidade no dedikasaun akadémika, atu kria patriótizmu no nasionalizmu, nune'e bele mantein no kontinua luta ne'ebé eroi sira halo ona iha nasaun ne'e. Isar bandeira regular kada fulan ida ne’e nu’udar parte ida husi kompromisu Universidade Nasional Timor-Lorosa’e (UNTL) nian hodi mantein disiplina no entuziazmu akadémiku entre estudante sira.