FECT

Dili, Hera, 15 Fulan-Novembru 2024 - Universidade Nacional Timor Lorosa’e (UNTL) hala'o selebrasaun ba nia Aniversáriu ba dala 24 ho tema "UMA UNTL MAIS DIGITAL". Selebrasaun ne'e realiza iha Auditóriu Dr. Gabriel António de Sá, Fakuldade Enjeñaria UNTL, no hetan partisipasaun husi figura importante lubuk ida no komunidade akadémika UNTL. Nu’udar parte ida husi selebrasaun ne’e, UNTL ofisialmente lansa sistema dijitál hamutuk 24 hodi fó apoiu ba transformasaun dijitál iha Universidade Nacional Timor Lorosa’e (UNTL). Lansamentu ne’e lansa husi Prezidente Repúblika Demokrátika Timor-Leste, Dr. José Ramos-Horta, hamutuk ho Magnífiku Reitór UNTL, Profesór dr. João Soares Martins, MPH,Ph.D, Reitor Universidade Minho Portugal nian, Profesór Doutor Rui Vieira de Castro, Dekanu Fakuldade Enjeñaria, Siénsia no Teknolojia, Profesór Adalfredo G. da Silva Ximenes, M.Eng., no hamutuk mos ho dekanu fakuldade sia iha UNTL. Sistema dijitál hamutuk 24 ne’ebé lansa ne’e nu’udar rezultadu servisu maka’as husi Gabinete Proreitór ba Asuntu Informatizasaun no Transfromasaun Dijital no Inovasaun (PRAITDI) ne’ebé lidera husi Proreitór PRAITDI, Prof. Frederico Soares Cabral, Sistema ne’e dezeña atu hasa’e efisiénsia, transparénsia no asesibilidade ba servisu akadémiku no administrativu oioin iha UNTL. Iha okaziaun hanesan, UNTL anunsia Fakuldade Enjeñaria nu'udar manan-na'in ba Campeonato Taça Rotativa UNTL 2024. Prémiu ida-ne'e fó ba Fakuldade Enjeñaria tamba kolekta pontu aas liu iha kompetisaun ofisiál oioin ne'ebé hala'o iha UNTL iha tinan 2024. Prezidente Dr. Ramos-Horta direitamente entrega piala ne’e ba reprezentante Fakuldade Enjeñaria. Eventu ne’e partisipa mós husi Magnífiku Reitór husi Universidade do Minho Portugal Profesór Rui Viera de Castro, Komandante Polisia Munisipiu Dili Sr. Orlando Gomes, Visereitór Proreitór, Diretór Jerál, Diretór Nacional, Xefe Departamentu, Dekanu, Dosente, Funsionáriu no estudante no konvidadu sira. Atividade ida ne’e ho komitmentu UNTL nian atu kontinua dezenvolve no sai nu’udar instituisaun Ensinu Superiór ne’ebé exelente no úniku iha Timor-Leste. Selebrasaun Aniversáriu ida-ne’e la’ós de’it momentu reflesaun no agradesimentu nian, maibé hatudu mós inovasaun no kolaborasaun ne’ebé kontinua dezenvolve iha UNTL nia laran, liuliu liuhosi inisiativa dijitál sira ne’ebé foin lansa no implementa ona.